Tut la natira grischuna sut in tetg

Il Museum da la natira dal Grischun posseda dapli che 360'000 differents objects ch'illustreschan l'entira varietad da la natira da noss chantun.

In portg selvadi en il laboratori dal Museum da la natira dal Grischun.
Legenda da maletgs: In portg selvadi en il laboratori dal Museum da la natira dal Grischun. RTR, Maria Victoria Haas

A la via da Masans a Cuira èn da chasa stgilats alvs, pors selvadis – u era raritads sco Fridolin, il bastard mez chaura e mez capricorn ch'il museum aveva cumprà cun l'intent da perscrutaziun. En il plaun sutterran, en il local da protecziun per bains culturals, sa chattan objects prezius, sco la collecziun da tschittas ch'è var 230 onns veglia. Ed en ina gronda frestgera spetgan ils pli divers animals en satgs da plastic – ch'il preparatur vegn insacura a metter en parada.

La Marella dat in cuc en tschalers e lavuratoris, guarda co che animals vegnan archivads e conservads, sa metta als fastizs da l'origin da la collecziun dal museum, e mussa co che la moda e maniera da preschentar natira è sa midada ils davos 150 onns. Sa midà ha, tenor ils pedagogs da museum, era la relaziun e savida ch'uffants han oz da la natira davant porta.

Redacziun: Maria Victoria Haas