Minisguard dals 22.12.2018

Or da rument datti art

Precis quai han fatg 3 artists. I dat numnadamain mintg'onn in clean up day sin il territori da skis da Flem Laax Falera. L’idea è da rumir tut il rument e quai da fazielets enfin skis. Quest onn n'han ins però betg bittà davent tut il rument – na 3 artists han fatg art ordlonder. Nus faschain ina visita a l’exposiziun en la chasa melna a Flem.

Da la laterna magica al smartphone

Il Museum retic a Cuira sa preschenta actualmain sco cabinet da curiusitads. Sut il titel «Laterna magica» pon ins contemplar ina show da multimedia cun maletgs istorics, e quai cun agid da tecnologias da projectar ch'ins ha sviluppà ils ultims tschientaners. La tecnologia da lura è dentant anc adina la basa da mitga projecziun en il kino.