Mia vita – mia musica: cun Reto Mayer

Sunar, chantar e diriger sa tira sco in fil cotschen tras la vita da Reto Mayer. Il di che el ha cumbinà ed arranschà in marsch tradiziunal cun in famus toc da rock fiss el bunamain rivà en praschun...

Fotografia dal chau da Reto Mayer
Legenda da maletgs: Reto Mayer, ils davos 19 onns correspundent per RTR per l'Engiadina e la Val Müstair. RTR, G. Dazzi

Gia sco giuvenil a Sent ha Reto Mayer entschet a far musica. Cun mirveglias e perseveranza ha el cumenzà sco autodidact a sunar l'emprim la clarinetta, lura il saxofon, pli tard l'accordeon da maun ed avant tschintg onns cun 60 ha el entschet a sunar la tuba. Durant passa 30 onns ha el era dirigì la «Musica da Giuventüna Engiadina Bassa» e pli tard la «Società da musica Scuol». Reto Mayer raquinta daco ch'el ha fundà cun 18 onns ina band dad Oberkrainer e betg ina band da rock, era sch'el era gia lura fieu e flomma per Queen e Supertramp, e daco chel ha bandunà ses job sco «Capo funtanas» da Scuol per far radio tar in emettur local e pli tard tar RTR. Ils davos 19 onns è Reto Mayer stà ina da nossas vuschs che ha rapportà cun passiun da l'Engiadina e la Val Müstair.

Redacziun: Guadench Dazzi