Silke Margherita Redolfi: «Jau sun superbia dad esser feminista»

Avant stgars 20 onns ha ella confundà l'Archiv cultural da dunnas a Cuira. Perquai che l'istorgia da las dunnas na saja vegnida rimnada nagliur. Entant è l'archiv bain emplenì cun documents, fotografias e cudeschs.

La manadra da l'Archiv cultural da dunnas, Silke Redolfi, amez las curunas en l'archiv.
Legenda da maletgs: La manadra da l'Archiv cultural da dunnas, Silke Redolfi, amez las curunas en l'archiv. mad

Silke Margherita Redolfi n'è betg mo archivara, mabain era istoricra. Ed en questa funcziun s'occupa ella surtut cun l'istorgia da dunnas e lur dretgs. Uschia na saja quai per ella betg enclegentaivel, che las giuvnas ed ils giuvens d'ozendi na cumbattian betg pli per lur dretgs. Era sch'i saja evident, che l'egualitad da dunnas ed umens na saja anc betg cuntanschida dapertut - numnadamain tge che pertutga las pajas. Ella saja adina stada cumbattanta e saja superbia dad esser ina feminista.

En il Profil raquinta la dunna oriunda da Bever dal cumenzament da l'Archiv cultural da dunnas, pertge ch'ella legia per il mument il pli gugent en in cudesch davart l'arroganza e co ch'ella ha elavurà la mort da ses partenari.

Redacziun: Riccarda Müller

Autur/a: RTR/mü