Eduard, il pur da culm

La Televisiun Rumantscha preschenta sia seria da stad quest onn en il Kino Apollo a Cuira, in Kino vegl, ma bel! Quai pudessan ins era dir dal film da questa saira: Vegl ma bel!

Gion Tschuor aveva purtretà l’onn 2006 in pur da ses cumin Rueun, e na betg per nagut aveva el elegì Eduard Curtins, in original en ses pensar e ses far. Mintgatant ha el ina barbuna, in’autra giada nagina. Mintgatant fima el la pipa e pauc pli tard il toscani.

Uschia enconuschan blers vischins da Rueun Eduard Curtins, ma bler auter na san els betg. Eduard è gist uschè gugent sulet sco mal accumpagnà, ed il pli gugent sulet sin las aclas u sin ils culms. En Engiadina fiss quai prümarans, ma en Surselva funcziuna quai tut auter. Eduard passenta era l’enviern sin mises. Quai faschevan pli baud tuts, oz be anc el. «Eduard, il pur da culm», in film da Gion Tschuor.

RTR