Il füm blau ed il bindel mellan – il Brissago

Il Kino Apollo a Cuira è ina da las pli bellas salas cinematograficas en Svizra. Quai scheva almain il renumà cineast Daniel Schmid. Questa stad preschenta la Televisiun Rumantscha films or dal Kino Apollo; oz il film davart il «Brissago» in evergreen da RTR Radiotelevisiun Svizra Rumantscha.

Il tubac vegn da l’America, las lavurantas da l’Italia ed ils fimaders per gronda part dal Grischun. Il Brissago, questa cigara lunga, satiglia e sincera, sco che la reclama fa valair, vegn fatg anc oz sco avant 150 onns, cur che la Fabbricca Tabbacchi Brissago (FTB) è vegnida fundada.

En Surselva è il Brissago feminin, la Brissaga, quai che na mida nagut vi dal fatg ch’il tipic fimader da Brissagos è masculin. El as dosta cun tut la lunghezza dal Brissago cunter la moda da fimar cigarettas, anc pli ferm cunter il trend da na betg fimar pli, e fa or dal fimar il Brissago ina filosofia.

Il Brissago, la producziun e la filosofia – in film senza privels per la sanadad.

RTR