Or da l’archiv dad Arnold Rauch

Per la fin da la seria a stad «Sas anc?» cun films vegls or da l’archiv da la Televisiun Rumantscha preschenta Arnold Rauch in pèr contribuziuns, per uschè dir, or da ses agen archiv.

Cun ir giu en tschaler en tschertga ha el numnadamain chattà, vulì u na vulì, era da quai ch’el ha fatg sez, ina giada, avant onns. Cun sfugatar l’archiv al èn vegnids per mauns films ch’el aveva sez gia quasi emblidà. Talas producziuns èn per el er in mussament ch’esser redactur da la Televisiun Rumantscha è in mastergn pli che be interessant, perquai ch’ins inscuntra adina puspè situaziuns e cunzunt glieud ch’ins n’avess forsa mai inscuntrà en ina «vita normala».

Exempels? La bieraria ch’è gia daditg serrada ed emblidada, quella da Susch. Il purtret dal scriptur Leo Tuor sin la Greina. La demonstraziun da la charretta unica e tipicamain svizra. U er in extract or dad «Ustaria, la seria», sur dad ustarias veglias en il Grischun.

RTR