Otto Braschler e Steivan Liun Könz

Pli differents na savessan els betg esser, ils dus picturs, cumbain ch’i dat senz’auter era parallelas.

Otto Braschler, il pictur da Cuira, adina instradà cun il velo en la citad, cun il chavallut e la taila sin il portabagascha, per dissegnar surtut la citad veglia. Milli giadas ha Braschler dissegnà sia citad ed ins enconuscha las chasas, la bellezza da las giassas, pli bellas ch’en realitad.

Braschler era in original da Cuira, betg propi acceptà dals experts, tenor quels era el surpassà dal temp, refusader da la moderna. Quai dentant n'ha betg impedì quella giada il giuven Hendri Spescha da far in purtret fascinand dal pictur da Cuira (1979).

Dus decennis pli tard (1998) è mort Steivan Liun Könz, enconuschent tras ses sgrafits fantastics, nunspetgadamain baud, cun be gist 57 onns. Cur ch’il fotograf scolà aveva constatà sin in viadi en l’Africa, che tut sias fotografias eran sutexpostas ha el cumenzà a dissegnar. Dissegnar è pli segir, di el en il segund film da la seria da stad «Sas anc?».

Era tar SLK, sco ch’el vegniva era numnà, ves’ins subit tge ch’el vul mussar, be che sias figuras n’existan betg en la realitad. Quai èn nimfas e dialas, diavels e liuns. E schizunt ils liuns, el sez aveva gea num Liun, n’èn betg reals, ma naschan or da sia fantasia incredibla.

Dapli dal tema

RTR/td