Paun jester ha siat crustas

Flot fissi, sch’ins avess in kino nua ch'i vegniss mussà mintg’emna in auter film rumantsch, di Arnold Rauch. Quai vegnia a restar in siemi, ma meglier che nagut saja da mussar almain sur stad films entirs, preschentads en il Kino Apollo a Cuira.

«Paun jester ha siat crustas», di il proverbi sursilvan, ed uschia ha era il film num che Christian Schocher ha realisà per la Televisiun Rumantscha il 1998.

Igl è l’istorgia da dunnas ed umens da la Surselva e dal Grischun central ch’èn ids la fin dals onns 60 per ils gronds hotels en l'Engiadina sco camarieras e chasseurs, sco mattas da chombra e portiers. L’ultima generaziun da quels stagiunaris era gia il 1998 magari veglia, uschia ch’igl è stà bun che Christian Schocher ha laschà raquintar els e lur patruns da quel chapitel pauc enconuschent da l’istorgia da l’economia grischuna.

RTR