Raritads, moda e teater musical d'uffants

Tut insatge auter! Quai scheva mes vischin adina, cura ch’el cumenzava a raquintar in’istorgia, e gia aveva el tratg tut l’attenziun sin el. Tut insatge auter datti da vesair questa giada, per finir nossa seria «Sas anc?» cun films dals onns 60 e 70.

Entant che las ultimas sis ediziuns èn stadas tematicas, è l’ultima emissiun da questa stad multifara, mintga giada tut insatge auter. Quest’emissiun cumpiglia las pli differentas contribuziuns e persunas. Per exempel vegni preschentà la moda d’enviern da l’onn 1971. Il meglier skiunz rumantsch da quella giada, Dumeng Giovanoli, na va betg be cun ils skis amez la stad, el commentescha er ina cursa a val. Ed in dals films il pli simpatic da quest onn è segir il teater musical dals scolars da Flem da l’onn 1967. Tut quai è tut auter che per il solit.

RTR