Siglir tar il cuntegn

Header

Anna Maria Duff Cahenzli (57) sin in prà a Laus sin 1300 m s.m.
Legenda: Anna Maria Duff Cahenzli (57) sin in prà a Laus sin 1300 m s.m. RTR, Gaby Degonda
cuntegn

Cuschina indigena e biodiversa Anna Maria Duff-Cahenzli – pura da bio a Laus

Anna Maria Duff-Cahenzli da Laus è pura da bio. Chaschiel d’alp, tuargias da tuttas sorts, liongias setgas e bler auter tutgan tals products biologics dal Bain Duff. Durant las emnas d'avust e settember ans raquinta Anna Maria Duff da sia lavur sco pura.

Anna Maria Cahenzli è oriunda da Siat. Avant 32 onns ha ella maridà Marcus Duff da Laus. Ensemen han els gì quatter uffants ch'èn gia creschids. Rafael Duff, in dals figls ha surpiglià il manaschi puril da la famiglia. Il mument mainan las duas famiglias il manaschi puril en cuminanza.

Anna Maria è ina dunna cun grond gust da empruvar ora chaussas novas ed ella cultivescha verduras per part exoticas en sias serras da cultivaziun sin bun 1'300 meters sur mar.

Ils davos 25 onns è la dumonda per urtais da far capuns creschida massivamain. Enfin 7'000 urtais venda la famiglia Duff sin lur stan da products biologics. Per che quels creschian bain han ils Duffs installà serras da cultivaziun sin ina spunda sulegliva a Laus. Da l'era tempriva van las plontinas directamain en la serra.

Ina gronda passiun e hobi da la dunna da 57 onns èn dentant era sias giaglinas. Var 50 giaglinas giaudan la libertad en il grond claus gist sut la chasa dals Duffs.

Bleras giadas saja da trair a niz las uras da la damaun baud u las uras da la saira per pudair producir tuargias, di Anna Maria Duff. Sia lavur principala è da preparar la rauba per la fiera emnila a Glion.

L'enviern vegn Anna Maria Duff-Cahenzli creativa:

RR Tips trics e tacs 10:15