Digitip – «Advent App»

Questa applicaziun per il telefonin è l'alternativa per tut quels che n'han anc betg organisà in chalender d'advent u lessan ina giada insatge auter, ma tuttina persunal.

in regal en fruma da pachet – il simbol da l'applicaziun
Legenda da maletgs: «Advent App» – il chalender d'advent persunal per il telefonin. advent-app.com

Avrir dal 1. fin ils 24 da decermber mintga di ina porta e guardar tge surpresa che sa zuppa davostiers, quai pon ins ozendi natiralmain er far sin il telefonin enstagl dad en la furma usitada.

La «Advent App» è nagut auter ch'in chalender d'advent electronic ch'ins po metter ensemen sez e lura regalar ad insatgi. Davos mintga porta virtuala pon ins zuppar atgnas fotografias, texts, videos da youtube u er gifs (pitschnas animaziuns).

Simpel ma tuttina bleras pussaivladads

Quests simpels elements da basa porschan bleras pussaivladads per esser creativs. Quai tanscha da la simpla fitg bella fotografia da las vacanzas cun intgins bels pleds fin tar la chanzun preferida u ina fotografia d'ina buna petta cun il recept latiers per insatgi che fa gugent pettas.

In grond avantatg è ch'ins na sto betg finir l'entir chalender avant che regalar el. Ins po far p. ex. be las emprimas trais portas e lura dafertant tiers cumplettar el e crear la porta dals 24 da december p. ex. pir ils 23 saira.

Nua è il crutsch?

I na dat betg gronds crutschs tar questa applicaziun. Chargiar giu ella e crear chalenders d'advent è gratuit. Chargiar giu e regalar ils chalenders ch'ins ha creà sez cunsta però 1 franc.

Per pudair avrir in chalender ch'ins ha retschavì ston ins installar l'applicaziun. Ed actualmain pon utilisaders dad Android be retschaiver ed avrir chalenders, ma betg crear agens.

Autur/a: Gion Gieri Flepp