Digitip – «Alertswiss» per cas urgents

Tgi che auda ina sirena d'alarm sto reagir. Ma co? Perquai che pli e pli blers na san betg, tge ch'igl è da far sch'ins auda ina tala sirena, ha la Confederaziun sviluppà l'app «Alertswiss». Ella alarmescha ed infurmescha en cas da catastrofa.

L'applicaziun è da la Confederaziun ed è gratuita.
Legenda da maletgs: Keystone

L'app Alertswiss è en emprima lingia qua per proteger la populaziun. Quai vul dir, sch'i dat in cas urgent, u ina catastrofa en Svizra, lura dat er l'app sinzur e trametta ina notificaziun da push. L'avantatg da l'app visavi la sirena d'alarm è, che quella alarmescha betg be, ella declera er gist co ch'igl è d'agir.

Infurmaziuns vastas

Ma l'app sa anc in zic dapli. Ella declera betg be en cas d'alarm tge ch'è da far. Ella cuntegna er bleras infurmaziuns. Ella gida per exempel ad ins da tschentar si in plan d'urgenza. En in tal san ins per exempel fixà, nua ch'ins s'entaupa cun ils confamigliars en cas ch'ins sa perda u sch'ins è en differents lieus, cura ch'i capita ina catastrofa. Ella declera er quant da mangiar u da baiber ch'ins stuess avair a chasa en cas ch'il provediment avess da crudar ensemen.

Regiunal

Per betg vegnir bumbardà da tut ils alarms en l'entira Svizra, pon ins tschentar en differentas funcziuns tar Alertswiss. Per l'ina pon ins dar en ils chantuns davart ils quals ins vul vegnir infurmà e per l'autra pon ins er tschentar en la funcziun da localisaziun vi dal telefonin. Lura sa l'app exact en tge regiun ch'ins sa chatta e po infurmar en cas d'urgenza.

Autur/a: Lea Livers