Digitip – applicaziun per sminuir la ristga da lavinas

Dapi l'onn 1936 èn en media mintg'onn mortas 25 persunas pervia d'accidents da lavinas. Schi dat ina lavina ni betg na pon ins betg influenzar. Entras esser infurmà bain pon ins dentant sminuir la ristga.

White Risk duai sminuir la ristga da lavinas
Legenda da maletgs: White Risk duai sminuir la ristga da lavinas. Keystone

Ina funtauna d'infurmaziun è l'applicaziun da l'institut federal per la perscrutaziun da naiv e lavinas White Risk. L'applicaziun White Risk offrescha in bulletin da lavinas interactiv sco er datas actualas tar la situaziun da naiv ed aura. Las datas actualisescha White Risk la damaun a las otg e la saira a las tschintg cun las mesiraziuns da las staziuns dals chantuns e dal SLF.

En pli han ins la pussaivladad da chargiar la tura planisada sin ina carta offline che mussa las pendenzas da las spundas. White Risk sustegna ils consuments damai cunzunt en la fasa da planisaziun e prepara ils viandants cunzunt er sin trajects delicats da la tura.

Betg mo sa fidar sin l'applicaziun

Er avantlieu pon ins profitar da White Risk: L'applicaziun furnescha savida da basa davart lavinas che gida da giuditgar il privel avantlieu. E la funcziun da sistem da navigaziuns (GPS) pussibilitescha deruir l'atgna posiziun sin la tura.

Durant la tura cusseglia il prognosticher da lavinas dal SLF Gian Darms dentant da betg sa fidar cumplettamain sin l'applicaziun. I saja impurtant da sa confruntar cun la situaziun actuala e da reagir sin signals d'alarm. La situaziun avantlieu possia numnadamain esser differenta a la previsiun – quai meglra u mendra.

Gratuit, però limitadamain

L'applicaziun è disponibla per IOS e per Android – gratuit. La funcziun da chargiar giu la tura sin ina carta per il diever offline è dentant mo limitadamain gratuita. Ils emprims 2'000 quadrels èn gratuits. Uschia duess l'access sin las cartas en l'entir territori Grischun esser gratuit.

Mintga ulteriurs 1'000 quadrels custan in franc. Quels 1'000 quadrels correspundan a dus da totalmain 150 fegls da la carta geografica da las Alps. Cun 75 francs san ins damai cumprar l'entir territori da las Alps da la Svizra.

Alternativas tar l'applicaziun da lavinas White Risk datti strusch. I dat bain applicaziuns per planisar rutas – dentant senza l'aspect da privels da lavinas.

Autur/a: Nora Baltermia