Digitip – Apps per crear atmosfera da Nadal

Per blers è il temp d'advent in temp emplenì cun termins ed obligaziuns e per sa preparar sin Nadal resta memia pauc tem. Perquai preschenta il digitip quest'emna apps per stgaffir l'ultim mument atmosfera da Nadal.

Cullas da pigniel.
Legenda da maletgs: Tips digitals per crear atmosfera da Nadal. Colourbox

Tar Nadal tutgan er las chanzuns da Nadal. La app Christmas radio porscha durant il temp da Nadal 24 uras il di mo hits da Nadal. Mancar na dastgan però er betg ils grassins da Nadal. Per tgi che n'ha anc betg gì temp da far tals porscha la app «Plätzchen Rezepte: Weihnachten» ina buna schelta da recepts. E per crear latiers specialitads da cafè, punsch ubain vin chaud datti la app «Winter-Rezepte: Glühwein & Co» per android e «Winter-Rezepte – Weihnachten» per iOS.

Nadal è però er la festa da far regals e da trametter cartas cun buns giavischs. Apps cun roms da Nadal porschan ina buna pussaivladad da crear anc l'ultim mument cartas digitalas ch'ins po lura trametter via messenger u squitschar ora. E per tgi che Nadal n'è anc adina betg perfetg, per quel u quella datti apps cun tuns da stgalin per il telefonin be cun melodias da Nadal.

Autur/a: Onna Riedi