Digitip – Apps per prender giu

La purschida dad apps da dieta è enorma. Per far la schelta ston ins sa dumandar l'emprim tge tip ch'ins è: in tip che fa gugent sport, ubain in tip che mira pli gugent sin las calorias.

La paisa è adina puspè in tema
Legenda da maletgs: La paisa è adina puspè in tema

Ussa ch'i va vers primavaira percorschan insaquants da nus quant strapatschant che l'enviern è stà...almain per la vestgadira...tut è pli stretg. Per blers è quai in motiv da far gigina ubain schizunt ina dieta. I dat diversas applicaziuns per telefonins che pon dar sustegn ad ins sch'ins vul far flucs cun ils kilos. Ina da quellas ha plaschì ordvart bain, perquai ch'ella è simpla d'installar e da duvrar. La app ha num FatSecret ed è telecargabla per tut ils sistems operativs. Fatg il test ha RTR era cun la app Snap it! Lose it! - ina app in pau pli cumplitgada cun numerusas funcziuns. E cun la app da sport Seven survegnan ins in trenament intensiv che dura mo set minutas.

Autur/a: RTR, Sandra Carisch