Digitip – Apps per proteger d’ina arsa dal sulegl

Las duas apps UVLens ed UV-Check empermettan da quintar ora quant lung ch'ins po star en il sulegl senza survegnir in'arsa. Omaduas resguardan il lieu, il temp e la crema da sulegl che vegn duvrada.

Blers turists che stan el sulegl a la riva da la mar.
Legenda da maletgs: Co sa proteger d'ina arsa dal sulegl? Keystone

La app UV-Check è ina app ch'è vegnida sviluppada da la Federaziun da dermatologs tudestgs. Cun agid d'infurmaziuns sur da la pel da l'utilisader, il lieu nua che quel sa chatta, las uras dal di ed il factur da protecziun d'ina crema da sulegl, quinta quella app ora quant lung che l'utilisader po star a sulegl. Ils resultats da la app na persvadan però deplorablamain betg. Ils temps ch'ins duess saver star a sulegl da miezdi cun pel sensibla èn definitivamain memia lungs.

La segunda app UVLens enconuscha cun agid da las datas da GPS immediat, nua che l'utilisader sa chatta e dat gest en da tge uras ch'ins duess sa proteger dal sulegl. UVLens dovra dapli infurmaziuns sur da la pel e las activitads da l'utilisader che UV-Check e porscha persuenter era resultats plausibels. In plus tut spezial da quella app è la funcziun d'alarm. Cura ch'igl è temp da dar si danovamain crema da sulegl, scalina il telefonin.

Autur/a: Onna Riedi