Digitip – Bloccar reclamas en l'internet

Tgi ch'è savens en la cuntrada da l'internet ha era gia vis las numerusas reclamas che cumparan per part dapertut. Saja quai be dezent a l'ur, amez il cuntegn ch'ins consumenscha u perfin cun tun e moviment. Qua datti tips per reducir la lavina da reclamas en il web.

Dapertut mo reclama
Legenda da maletgs: Dapertut mo reclama. RTR, Dominik Hardegger

I dat numerus tools d'agid sch'ins vul bloccar reclamas en l'internet browser.

Desktop

Extensiuns da browsers che reduceschan la reclama sin il computer a chasa chatt'ins sut «Einstellungen -> Add-On» u «Erweiterungen».

Là pon ins lura tschertgar tenor il chavazzin «AdBlock» e smatgar sin «zu Browser hinzufügen».


Per ils suandants browsers d'internet datti da quellas extensiuns:

  • Google Chrome
  • Safari
  • Firefox
  • Opera
  • Microsoft Edge

En l'Internet Explorer na datti nagina pussaivladad dad installar extensiuns. L'internet Explorer è vegnì remplazzà cun Microsoft Edge che sustegna l'integraziun d'extensiuns.

Telefonin

Tar il telefonin dependi tge apparat ch'ins ha, e da tge marca ch'el è.

  • Safari sin l'iPhone sustegna extensiuns a partir dal iPhone 5S ed iOS 9.
  • Era per Android datti la pussaivlad da bloccar reclama: Tut tenor browser èsi simplamain d'installar in'autra extensiun.
  • Tgi ch'ha Firefox sin ses apparat mobil, po installar extensiuns cun la medema metoda sco sin in computer.
  • Per Google Chrome sin il telefonin na datti naginas extensiuns.


Auters browsers sin iPhone ed Android, sco Opera, han per part gia integrà in AdBlocker.

Autur/a: Dominik Hardegger