Digitip – chattar la tenda a l'open air

Tgi n'ènconuscha betg questa situaziun: Suenter il concert na chatt'ins simplamain betg pli la tenda en la fulla da tendas. L'applicaziun Find My Tent Now po gidar.

Tendas
Legenda da maletgs: Chattar l'atgna tenda n'è betg adina uschè simpel. Pixabay

L'applicaziun Find My Tent Now funcziunescha suandantamain: Al lieu giavischà arcunescha l'app las coordinatas dal lieu. Cura ch'ins vul turnar maina l'applicaziun ins sur la via inditgada sin ina charta enavos tar la tenda.

Per in franc datti la versiun premium. Quella versiun po er manar ins senza rait mobila, be sur GPS enavos tar la tenda. Er datti la pussaivladad da laschar mussar la via be cun in paliet, senza charta.

Find My Tent Now datti per iOS ed Android. Ina app simpla che po gidar fitg bain per chattar l'atgna tenda en la fulla da tendas a l'open air.

Autur/a: Gion Gieri Flepp