Digitip - Co vegnir pli lunsch cun 1 chargia

Pli fitg ch'ins dovra il telefonin e pli impurtant ch'igl è che l'accu tanschia ditg. Qua ils tips per 'surviver' pli ditg cun ina chargia.

telefonin cun accu pli e pli vid.
Legenda da maletgs: L'accu, dapi ch'i dat il telefonin in punct da discussiun etern. colourbox.de

Il diever d'energia cun il telefonin variescha, tut tenor co ins al dovra: Per telefonar, sco biro mobil ubain sco maschina da divertiment cun gieus e video. Cler, il pli simpel èsi: tschentar giu questas funcziunalitads ch'ins na dovra betg u strusch. En general pon ins activar e deactivar las funcziunalitads en las opziuns (Android ed iOS), per part era en las singulas apps.


Il VISUR maglia la pli blera energia.

  • Reducir la clarezza standard dal visur, uschia ch'ins po leger tut senza stenta e strapatsch per ils egls.
  • Drizzar en la bloccada dal visur suenter in tschert temp ch'ins n'al ha betg duvrà.
  • Reducir dumber da notificaziuns e 'pushs'. Mintga giada vegnan questas notificaziuns mussadas sin il visur che mangia energia.


Las COLLIAZIUNS dal telefonin cun la rait dovran relativ blera energia. Pli falombras che las colliaziuns èn, e dapli energia ch'ellas consumeschan.

  • Deactivar Wlan e bluetooth – surtut cura ch'els èn flaivels, perquai ch'els dovran lura la pli blera energia.
  • Reducir il dumber e la durada da la localisaziun via GPS. Betg lubir a tut las apps da localisar permanentamain voss telefonin.
  • Betg tadlar musica via livestreaming. Tadlar musica arcunada sin il telefonin dovra la mesadad da l'energia.


Cun REDUCIR FUNCZIUNS (sut opziuns battaria u energia) gidi da schanegiar l'accu – ha però consequenzas per la qualitad. Perquai decider sapientivamain, per tge funcziun ch'ins vul 'pajar' cun energia.

  • Deactivar l'opziun ch'il cuntegn da la app vegn actualisà trasora (saja quai mail ubain autras apps)
  • Ponderar, tge qualitad ch'ins vul tar fotografias e videos. Far fotos u videos cun HD dovra per exempel damain energia che cun 4K.
  • Bloccar reclama (cun apps ubain era en las opziuns). Savens chargian questas automatic in purtret, ed adina pli savens era in video; quai che dovra dapli energia.


En general vala: EVITAR EXTREMS. Saja quai cun il diever dal telefonin sco era cun al tractar:

  • Betg chargiar / dischargiar total il telefonin, mabain al laschar pendular tranter 20% ed 80%.
  • E sa chapescha evitar chaliras e fredaglias.


Il MODUS DA SPARGNAR ENERGIA, ch'ils telefonins han, pon gidar tut quels che na vulan betg sa fatschentar memia savens cun las dumondas sura. Quest reducescha era tschertas funcziuns sco da chargiar automaticamain ils mails. Però pudess el era bloccar funcziuns ch'ins vul tuttina en megliera qualitad.


En mintga cas renda quai da tschà e là guardar, tgeninas apps che dovran la pli blera energia, selecziunar pli strict quai ch'ins dovra propi ...

Autur/a: RTR/uca