Digitip – «Coople» – Colliar lavurers ed interpresas

Lavurar cura e nua che Ti vuls – quai empermetta l'applicaziun «Coople». Lapplicaziun funcziuna sco plattafurma per porscher lavur u tschertgar lavurers a curta vista. Tenor atgnas indicaziuns da la plattafurma èn radund 12'000 interpresas è 300'000 persunas sa registradas sin la «Coople».

«Coople» – Colliar lavurers ed interpresas
Legenda da maletgs: «Coople» – Colliar lavurers ed interpresas SRF

L'applicaziun sezza funcziuna fitg simpel. Tant persunas privatas sco era interpresas pon s'annunziar sin la plattafurma. Quai dentant natiralmain mo cun indicaziuns correctas e seriusas. Via la plattafurma pon las interpresas alura scriver ora plazzas temporaras. Ellas inditgeschan la branscha, las qualificaziuns giavischadas, linguas, temp e lieu da lavur e la paja. Persunas privatas pon inditgar las differentas spartas nua ch'ellas han las abilitads e qualificaziuns per lavurar.

Correspunda ina persuna ad in job survegn ella ina annunzia sin il telefonin da s'annunziar per la plazza. L'interpresa survegn silsuenter ina glista cun tut ils candidats per la lavur e sa alura selecziunar tge persunas ch'ella vul emploiar a curta vista. Pajà vegn tenor las uras lavuradas.

Autur/a: Samuel Sossai