Digitip – Cuntanschibel malgrà telefonin mit

Durant la notg na vulan blers betg vegnir disturbads da suns e tuns dal telefonin. Latiers datti la funcziun «betg disturbar», ch'è segnada cun ina mesa glina. Spetgan ins il medem mument in impurtant telefon, pon ins definir cura ch'il telefonin duai scalinar excepziunal.

Ins po definir favurits, tar quels ch'il telefon scalina er en il modus «betg disturbar».
Legenda da maletgs: Ins po definir favurits, tar quels ch'il telefon scalina er en il modus «betg disturbar». RTR

Tant tar telefonins dal sistem da apple sco er d'android ston ins l'emprim definir contacts favurits. Telefoneschan quels durant ch'il telefon è en il modus da «betg disturbar» scalina il telefonin tuttina. Tar iPhones pon ins definir favurits via il simbol verd ch'ins dovra er per telefonar «Telefon». En la rubrica «Favoriten» pon ins agiunscher favurits cun in clic sin «+». Tar telefonins da android pon ins definir favurits en la glista da contacts. Quai cun in clic sin la staila. Silsuenter ston ins navigar en las configuraziuns dal telefon ed edittar il modus da «betg disturbar», activar la funcziun ch'i duai scalinar sche favurits telefoneschan.

Radis da telefonia datti tuttina

È la funcziun da «betg disturbar» activa, scalina il telefonin be excepziunalmain sche ils definids favurits telefoneschan. Uschia è il telefonin adina activ ed il telefonin producescha tuttina radis da telefonia. Tgi che vul evitar quels radis, po tschentar metter il telefonin en il modus da sgol u tschentar giu il telefonin. Ma lura è il telefonin propi adina ruassaivel!

Autur/a: Yvonne Simmen/ Flurin Clalüna