Digitip – Huawei fa pensiers per ses telefonins

Telefonins da Huawei pudessan daventar massiv main attractivs. La raschun è cunzunt la dispita da commerzi tranter ils Stadis uni e la China.

Huawei
Legenda da maletgs: Huawei. Keystone

Il president american Donald Trump ha prendì ina decisiun cun grondas consequenzas. La firma americana Google na dastga betg pli furnir al concern chinais Huawei sistems operativs d'Android. Per utilisaders che han gia in tal telefonin munta quai pauc. Ma per in client che cumpra uss in telefonin da Huawei muntass quai gronds disavantatgs. Ils telefonins novs na survegnan betg pli up-dates da Google, els n'han nagin access ad apps ed er betg servetschs sco google-maps u g-mail. Per in client en Svizra vul quai pia dir da ponderar bain tge telefonin ch'el duess cumprar en l'avegnir.

Autur/a: Gabriela Desax