Digitip – Il firmament plain stailas e nagin'idea dals nums

Adina puspè fai surstar tge ch'i dat tut da vesair la notg, sch'ins guarda en il tschiel. Las stailas, constellaziuns sco l'Urs pitschen e grond u il Lupus. Per propi savair tge ch'ins vesa al firmament, pon ozendi era apps gidar.

Vista nocturna sur il chantun Berna, cun bleras stailas ed anc dapli glischs.
Legenda da maletgs: Vista nocturna sur il chantun Berna, cun bleras stailas ed anc dapli glischs. Keystone

Sky-View è l'app che na dovra nagina colliaziun cun l'internet. Sin l'acla, sin chamona u simplamain sin canapé – dapertut mussa Sky-View tge stailas ch'ins vesa grad al tschiel. E l'app augmenta sin giavisch anc il maletg actual dal telefonin, cun mussar davostiers diversas constellaziuns da las stailas. In punct negativ da l'app ch'i dat per Android e per iOS è ch'ella è per engles. Sch'ins vul duvrar il menu, ston ins chapir in zic englais.

App tudestga

Ina buna app tudestga è Sky Map da Google, per telefonins d'Android. Quella mussa ina carta da las stailas sco ins enconuscha ord cudeschs. E sch'ins tschertga ina speziala constellaziun sco l'Urs grond, pon ins simplamain dar en il num tudestg e laschar encurir.

Sche stailas mancan

Magari èn era mo paucas stailas da vesair al firmament, e betg adina èn ils nivels la culpa. Glisch ferma en il conturn po disturbar la vista. Ed i dat in'app che vul savair gist quai, num ha quella «Verlust der Nacht». Cun tegnair la camera dal telefonin en direcziun d'ina staila, vul l'app savair sch'ins vesa quella u betg. Cun sa participar pon ins sustegnair in project che rimna las datas, nua che la glisch turbla la vista sin las stailas.

Tuttas trais apps èn gratuitas. E cun excepziun da Sky Map datti tuttas tant per Android sco era per iOS.

Autur/a: Alexi Baselgia