Digitip: Memia bun per bittar davent

L'app cun il num «Too Good To Go» vul dar cuntrapaisa al sfarlattim da mangiativas e dar ina plattafurma a fatschentas e clients, che vulan cumprar e vender quai che resta la saira enavos en stizuns, pasternarias ed ustarias.

Evitar daquels maletgs less l'app oriunda dal Danmarc.
Legenda da maletgs: Evitar tals maletgs, quai vuless l'app oriunda dal Danemarc. Keystone

Enfin ussa sa participeschan bun 400 fatschentas a l'applicaziun «Too Good To Go». Quellas mettan a disposiziun lur mangiativas e products che restan enavos la fin dal di. Persunas privatas pon s'annunziar e far diever da questa purschida ed uschia cumprar menus u products per in pretsch fitg reducì. Uschia sa tschenta pli pauc en il rument. Concret vegn vendì sur l'applicaziun bun 15'000 menus u products per mais.

Il Grischun cun pitschna purschida

En regiuns urbanas sa participeschan gia bleras fatschentas a l'acziun. En il Grischun vesa quai anc ora auter. Be in café ad Arosa ed in a San Murezzan èn sin la plattafurma e mettan (sch'i dat) a disposiziun lur rests. Cun questa applicaziun speran ils iniziants da reducir il food waste en Svizra. Bun 2 tonnas mangiativas sa tschentan onn per onn en il rument. Dapi curt testeschan er detaglists gronds sco la Migros u Coop l'applicaziun.

Autur/a: Selina Chistell/ Flurin Clalüna