Digitip – Schubregiar telefonin e tastatura

Uss l'atun e d'enviern è puspè il temp per vegnir malsaun, cura ch'i fa fraid. Per evitar quai duessan ins gea lavar savens ils mauns cun savun e sche pussibel er desinfectar els. Il medem vala er per il telefonin e la tastatura dal computer.

Dunninas che nettegian il telefonin da rudien.
Legenda da maletgs: Pixabay

Material necessari:

  • Alcohol (isopropanol), alternativ er faziels per nettegiar ils egliers
  • Aua (aua destillada lascha enavos pli paucs fastizs che aua da la spina)
  • In sdratsch da microfibra
  • spungia
  • foradents
  • bastunets da vatta
  • barschun da dents

Smartphone e tablet

En media tutgain nus 2'500 giadas a di il telefonin. E nus prendain cun el dapertut: en il bus, en il restaurant ed er sin tualetta. Betg da smirvegliar che bleras bacterias sa rimnan sin la surfatscha. Perquai èsi cusseglià da nettegiar regularmain il telefonin. Il meglier va quai cun in sdratsch da microfibra umid (aua ed in zic savun) u ch'ins po er schubregiar il telefonin ed il tablet cun alcohol. Da meds pli agressivs sco nettegiader da glas èsi meglier da laschar la detta. Quel po donnegiar ils visurs. Purla e fils che blocheschan la rusna per chatschar en il cabel da chargiar il telefonin pon ins allontanar cun in foradents. Ma attenziun! Betg stgavar memia fitg.

Tastatura

Tut tenor tastatura tanscha ina spungia u in sdratsch per nettegiar la tastatura. Quai vala surtut per las tastaturas pli bassas da laptops. Tastaturas separadas duess ins volver sin tgau e scurlar ora per vegnir ora cun il da grop. Tranter las tastas vegnan ins bain cun in barschun da dents umid. Tgi che vul schubregiar propi da rudien po era pigliar davent las tastaturas singulas e bittar quellas en la maschina da lavar giu. Faschai dentant ina fotografia da la tastatura avant che pigliar davent els, pertge uschiglio èsi grev da puspè chattar il dretg lieu per mintga tasta.

Monitur

Er qua pon ins schubregiar bain cun agid d'in sdratsch da microfibra. Il meglier èsi da stritgar be fin en rudels sur il visur, per betg donnegiar el. Per tatgas pli fermas pon ins era duvrar alcohol.

Uregliers in-ear

Tegnair ils uregliers cun tgau engiu e fruschar vi e nà cun il barschun da dents. Betg memia ferm, uschiglio smatgan ins en anc pli fitg la merda en ils uregliers. Ultra da quai pon ins er duvrar in bastunet da vatta cun alcohol e lavar davent il rest dal tschuf.

Autur/a: Lea Livers