Digitip – sistems d'assistenza per guidar l'auto

Legenda da maletgs: Keystone

Grazia ad uschenumnads sistems d'assitenza per guidar l'auto datti damain accidents. A partir da la stad 2022 èn tals sistems obligatorics per autos novs che vegnan admess en l'Uniun europeica. Er en Svizra pretenda il Post da consultaziun svizzer per la prevenziun d'accidents BFU in tal obligatori.

Tar ils sistems d'assistenza che la UE pretenda per ils autos dal futur, sa tracti dals suandonts:

Sistem per franar urgentamain

Quest sistem fraina automaticamain, sch'el enconuscha in privel da collisiun. Per novs autos da persunas e camiuns sur 3,5 tonnas èn tals sistems gia oz prescrits en Svizra. En futur duain tals sistems dentant esser obligatorics per tut ils autos novs.

Ins va or da quai che 38 fin 50% dals accidents da collisiun pudessan vegnir evitads cun tals sistems.

Sistems per tegnair il vial

Sistems per tegnair il vial, reageschan cura ch'in auto è londervi da bandunar il vial. Blers grevs accidents capitan numnadamain perquai ch'il manischunz è stanchel, nunconcentrà u tschorventà e perda perquai la controlla sur da l'auto. Premissa per che quels sistems funcziunan è dentant ch'i dat marcaziuns sin las vias e che quellas èn bain visiblas.

Cun tals sistems pudess mintga dieschavel da quels accidents vegnir evità.

Sistem intelligent per controllar la sveltezza

Quels sistems tiran endament al manischunz quant svelt ch'ins dastga charrar sin il traject ch'el sa chatta gist. Sche la sveltezza lubida vegn surpassada, reagescha il sistem cun dar cuntersquitscha al pedal da gas ubain cun signals acustics u optics.

Dasper quels trais sistems pretenda la nova regulaziun da l'UE per autos novs era in sistem che avertescha il manischunz, sche quel è stanchel u nunconcentrà sco era in assistent per charrar enavos. En pli ston ils autos dal futur era avair sistems da segirezza sco glischs da franar urgentamain, in regristratur da viadis (semegliont a la black box en aviuns) ed er in sistem che survegliescha precis il squitsch dals pneus.

Per tgi che vul s'infurmar pli detaglià davart ils differents sistems che gidan da guidar l'auto, porscha la pagina d'internet smartdrive.ch ina buna schelta.

Autur/a: Onna Riedi