Digitip – Stizzar u deactivar in conto da Facebook

Rapports en las medias davart enguladitschs da datas tar Facebook, fan adina puspè vegnir malsegirs ils utilisaders davart la segirtad da lur infurmaziuns persunalas. Il digitip declera, tge ch'ins sto savair, sch'ins vul stizzar u deactivar in conto da Facebook.

Il logo da facebook tras egliers da leger ch'engrondeschan mo tscherts bustabs.
Legenda da maletgs: Stizzar u be deactivar in conto da facebook. Keystone

Avant che stizzar in conto da facebook èsi da far in pèr ponderaziuns: Sch'ins ha per exempel duvrà il login da Facebook per avair access ad autras applicaziuns, lura èsi da verifitgar ch'ins vegnia er suenter anc sin las applicaziuns e midar ils logins. Ultra da quai èsi cusseglià da far ina copia da las datas ch'ins ha sin facebook. È l'account numnadamain stizzà, han ins nagin access pli sin quellas infurmaziuns e fotos.

30 dis per turnar enavos

La funcziun per stizzar il conto è in pau zuppada en la versiun da Facebook en il browser: Ins va l'emprim sin las «configuraziuns» (Einstelllungen), lura a sanester sin la funcziun «tias infurmaziuns da Facebook» ed en la fanestra che s'arva vegnan ins tar la funcziun da chargiar giu las atgnas infurmaziuns ed er sin quella da stizzar il conto definitiv.

Entaifer ils proxims 30 dis, suenter ch'ins ha inizialisà il stizzar dal conto, han ins anc la pussaivladad dad interrumper il process. En tut vai però fin a 90 dis, fin che tut las datas èn stizzadas.

Fastitgs restan

E tut ils fastitgs na vegn ins er cun stizzar il conto betg da stizzar: Amitgs che han suevegnì messagis u fotos, vesan er suenter il stizzar anc quels. Ed er Facebook po avair arcunà tschertas datas sco protocols e quels na vegnan betg stizzadas cun quest process. Uschia vegnan per exempel commentaris conservads sin facebook, però senza num da la persuna.

Be far ina pausa da Facebook

Sch'ins vul be far ina pausa da Facebook e buc stizzar tut las datas ch'ins ha arcunau, lura han ins la pussaivladad da deactivar l'account. Quella funcziun chattan ins, sch'ins va sut «configuraziuns» (Einstellungen) sin administrar l'agen conto e lura sin deactivar il conto.

Auter che la persuna che ha quest conto, na po lura nagin pli vesair l'entir profil. En la glista d'amis, vesan ils amis però anc adina il num dal profil, però nagut auter. Cun be deactivar il conto da Facebook restan ins cuntanschibels per ils amis sur il Messeger da facebook. Tgi che na vul betg quai, po dentant er deactivar quel.

In avantatg da mo deactivar il conto è, ch'ins po vinavant duvrar il login da Facebook per ulteriuras apps sco Spotify, Pinterest u gieus. E sch'ins decida insacura da puspè vulair turnar tar Facebook, èsi da tut temp pussaivel da reactivar il conto.

Autur/a: Onna Riedi/Samuel Sossai