Digitip – Tadlar musica senza salata da cabels

Salata da cabels.
Legenda da maletgs: Co evitar la salata da cabels cun tadlar musica. colourbox.de

Magari fissi schont flot da tadlar musica cun il telefonin ubain cun il laptop sur boxas enstagl dals uregliers. Però co pomai far quai senza chi dettia ina salata da cabels? Cunzunt schins vul udir la musica ina giada en stiva, lura pli tard en cuschina e la finala forsa anc en chombra.

Da principi datti duas vias per tadlar musica dal telefonin dadaut en las stanzas – senza uregliers e senza cabels:

  • u ch'ins collia il telefonin senza cabel cun la stereo chins ha gia e taidla cun lezzas boxas
  • u chins cumpra novas boxas che retschaivan direct in signal dal telefonin – sur wlan u sur bluetooth.

Via stereo

Qua datti simpels retschaviders da bluetooth – custan da quai da CHF 50 fin CHF 150. Quests mettins vid la stereo, e lura pon ins colliar il telefonin senza cabel cun il retschavider e voilà: musica dal telefonin senza cabel via la stereo dad auta qualitad.

Direct sur boxas

Atgnamain tanschan simplamain ina u duas boxas che han endadens in retschavider da bluetooth ni wlan. Lura va la musica direct sin questas boxas. Tals boxas datti gia per CHF 20 ensi. Quai è lura plitost in termagl chin deletg per tadlar musica.

In zic pli luxurius vegni cun in sistem che cuntegna in retschavider e latiers las boxas per ina u pliras stanzas. Tar quest va il signal cun la musica dal telefonin sin il retschavider – e quest reparta la musica sin tut las boxas colliadas; sa chapescha tut senza cabels. Quai munta però prender in pèr tschients francs enta maun – ed ensi na datti etg uschè spert cunfins.

La qualitad

La qualitad dal tun po però esser in zic main buna senza cabel che cun cabel. E pli gronda che la distanza tranter ils apparats è, e pli tgunsch chi po dar interrupziuns en la musica.

Apparats che rinforzassan ils signals che van tar las boxas gidassan bain, custassan però anc ina giada CHF 100.

Autur/a: RTR/ab