Digitip – Tips e trics per tschertgar cun Google

Passa la mesadad da tut ils carstgauns dal mund dovran l'internet. E quai betg mo per scriver messadis u parter impressiuns en las raits socialas, mabain savens er per tschertgar infurmaziuns. Cun pitschents tircs chatt'ins anc pli spert quai ch'ins vul en l'entira schurma d'infurmaziuns.

Tschertga cun Google.
Legenda da maletgs: Tschertga cun Google. pixabay
  • Per ina simpla tschertga na ston ins gnanc arver Google, ins po gist inditgar ils chavazzins en la gliesta alva sisum tar il browser (Firefox, Chrome, Safari eav.)
  • Formular quai ch'ins tschertga sco dumonda gida da chattar pli svelt ina clera resposta. P. ex. Quant greva è la pli greva zitga dal mund?
  • Sch'ins vul precisar la tschertga, p. ex. definir in tschert temp, ina regiun u tschertgar be documents da word, tut quai ed anc bler dapli pon ins far cun ir sin la pagina da Google e lura giudim dretg en il chantun sin «Preferenzas/Einstellungen» e lu sin «Tschertga avanzada/Erweiterte Suche».
  • Sch'ins vul che Google na tschertga p. ex. betg paginas Svizras, lura pon ins agiuntar a la dumonda u als chavazzins be «-Svizra». U in auter exempel: Sch'ins tschertga «Most» lura mussa Google er resultats che han da far cun benzin. Sch'ins vul però be la bavronda pon ins inditgar «Most -Benzin».
  • Per laschar tschertgar Google be sin ina singula pagina d'internet pon ins inditgar p. ex. «site:rtr.ch» e latiers il chavazzin. Quai guarda lur ora uschia: «site:rtr.ch Müstair». Lura mussa Google tut quai che sa chatta sin la pagina da RTR en connex cun Müstair.
  • Google sa era quintar: Ins po inditgar in quint sco tar il quintader (4*5 e lura mussa Google il resultat). La maschina da tschertgar sa schizunt quintar enturn mesiras: P. ex. da km en meters, da pe (mesira) en meters u tar recepts da scadiolas en grams. Quai cun las mesiras funcziuna però bain mo per englais.

Autur/a: Gion Gieri Flepp