Il digitip – Attenziun cun duvrar raits da WLAN publicas

Cun in simpel hack ha il team da l'emissiun Kassensturz da SRF chattà ora datas persunalas da persunas ch'utilisavan in WLAN public d'in cafè. Il digitip declera, co proteger las atgnas datas da maldiever.

Telefonin sper bus cun simbol da wlan gratuit.
Legenda da maletgs: Adatg cun duvrar wlans publics. Keystone

Tgi che vul propi proteger sias datas persunalas, quel duess evitar da duvrar WLANs u hotspots averts – saja quai en in cafè, ina citad ubain en in hotel. E tgi che va tuttina via ina tala rait en l'internet, duess almain far attenziun da betg trametter datas sensiblas sur quella rait. E latiers na tutgan betg sulettamain far pajaments via e-banking, mabain er trametter e-mails.

Alternativa VPN

L'alternativa da duvrar ina applicaziun da VPN – quai stat per ina rait virtuala privata – porscha bain in pau dapli segirtad en raits da WLAN libras. Daltut segira n'è la colliaziun dentant er betg cun ina tala applicaziun. Igl è sulet in pau pli grev per hackers da vegnir tar las datas.

Ils informatichers da RTR cusseglian perquai, da cumprar in pachet da datas tar il purschider da telecommunicaziun, pia tar la Swisscom, Salt, Sunrise etc e da betg duvrar raits da WLAN publicas. Igl è numnadamain pli segir da duvrar ina colliaziun d'internet directa sur la rait mobila. Las societads da telecommunicaziun porschan er pachets da datas per viadis en l'exteriur.

Autur/a: Yvonne Simmen / Onna Riedi