Il digitip – Tge apps valan la paina da chargiar giu?

Bleras apps èn mintga di in bun agid per la lavur ubain er per il temp liber. Autras èn simplamain coolas e divertentas. I dat però er quellas che custan gnervs e dovran datas persunals, senza che nus savain u vulain quai.

In maun cun in telefonin.
Legenda da maletgs: Examinar apps avant che chargiar giu. Keystone

Cun in pèr pass san ins chattar ora sch'i vala la paina da chargiar giu ina app ubain sch'igl è meglier da laschar la detta da quella.

Valitaziun en il store

En in emprim pass duess ins controllar las valitaziuns ch'èn gia vegnidas fatgas en l'app store. Qua èsi da dar dapli attenziun a las valitaziuns entamez. Sche blers utilisaders chattan che la app saja duvrabla, vala quai numnadamain dapli che mo paucas valitaziuns cun tschintg stailas.

Infurmaziuns sur dals sviluppaders

Er las infurmaziuns sur dal sviluppader da la app ch'ins chatta en il store èn dad interess. Va il link sin la pagina dad internet dal sviluppader ora en il vid u mo sin in'adressa dad e-mail anonima, lura duess ins esser sceptic. Bun èsi percunter sch'ins vegn sin ina pagina che porscha in tschert service sco per exempel la pussaivladad da far dumondas da support.

Gist tar apps gratuitas duessi er vegnir cler, co ch'ils sviluppaders vulan gudagnar daners. Cuntegn la app reclamas u ston ins tar la versiun da basa cumprar prestaziuns supplementaras?

Artitgels en la rait ed en las medias

In ulteriur pass da prender sut la marella ina app è da tschertgar infurmaziuns en l'internet davart la app. È quella vegnida discutada en in blogg u en in artitgel da medias cun focus sin computers ed applicaziuns? Fa la app empermischuns enormas ed ins na chatta tuttina nagut en la rait sur da quella, lura è quai suspect.

Tge autorisaziuns drova la app?

Sco ulltim duess ins era guardar critic sin las autorisaziuns ch'ina app drova: Fai propi da basegn ch'ina app drova il microfon u la camera da mes telefonin u er mes contacts? Datti nagin motiv relevant, che la app drova propi quellas datas, lura èsi meglier da betg chargiar giu quella.

Dal tut eliminar ils ristgs ch'i dat cun chargiar giu ina app, na san ins però betg. Er in product segir, d'ina interpresa seriusa po vegnir manipulà d'in terz che maldovra lura las datas persunalas.

Autur/a: Onna Riedi