La cifra - 40'000 persunas senza tetg en l'Italia

Suenter ils terratrembels en l'Italia han tenor rapports da gasettas talianas var 40'000 persunas nagin tetg sur il chau. Dentant ina cifra precisa davart las persunas senza tetg na datti betg.

Las persunas da las regiuns pertutgadas han pers lur existenza.
Legenda da maletgs: Las persunas da las regiuns pertutgadas han pers lur existenza. Keystone

Ina part da las persunas han chattà agid en locals da la protecziun civila. Auters van tar parents. Divers han era pernottà en lur autos, perfin en trens ch'èn vegnids mess a disposiziun da la viafier. Era tendas vegnan messas a disposiziun e la regenza ha appellà dad ir a l'Adria en hotels. Era vul la regenza metter a disposiziun containers provisorics che duessan porscher a la glieud in tetg.

Divers abitants dals vitgs destruids na vulan betg ir en auters lieus. Els vulan restar en lur patria. Lur uffanza, lur regurdanzas sajan en las ruinas dals vitgs. Els dian ch'els perdessan lur identitad sch'i massan davent da lur patria.

Avant quest ulteriur terratrembel aveva il prim-minister talian Matteo Renzi empermess 40 milliuns euros sustegn immediat per las dieschmilli persunas che han pers lur dachasa pervia dals terratrembels cuntinuants. Tut il necessari suenter il terratrembel vegnia mess a disposiziun, ha ditg Renzi suenter in inscunter da la regenza. Entant haja dà 1100 terratrembels posteriurs dapi dumengia.

Autur/a: RTR/fc