La cifra – 41'000

41'000 infecziuns da virustgel annunzia la WHO per la regiun Europa en l'emprima mesadad dal 2018. L'organisaziun mundiala da la sanadad discurra d'in augment dramatic.

Il virustgel è ina malsogna d'uffants fitg contagiusa
Legenda da maletgs: Il virustgel è ina malsogna d'uffants fitg contagiusa. KEYSTONE

Ils blers cas da virustgel (23'000) ha la WHO dumbrà en l'Ucraina. Entras ils conflicts èn ils programs da vaccinaziun e controlla interruts en la regiun da crisa.

Dal schaner fin il zercladur 2018 èn mortas 37 persunas entras la malsogna d'uffants fitg contagiusa. L'augment da las infecziuns cun il virus da virustgel en la regiun da l'Europa è dramatic tenor la WHO. L'onn 2016 hai dà 5'273 malsauns da virustgel, l'onn passà 23'927.

L'organisaziun mundiala da la sanadad pretenda mesiras dals stadis en l'Europa per evitar ina derasaziun pli gronda dal virustgel e la prevenziun entras vaccinaziuns.

La Svizra n'è betg pertutgada da quai augment tar il virustgel. Las infecziuns van enavos dapi diesch onns.

Autur/a: Marionna Lombriser