La fin da zercladur ha il Radio Rumantsch emess la davosa episoda da la radionovela «Vita capita». Durant la stad han collavuraturas e collavuraturs da RTR preschentà en quest plaz lur chanzuns preferidas. E dapi ils 22 d’avust aud'ins da glindesdi enfin venderdi, mintgamai a las 10:15 ina nova rubrica.
Glindesdi – Il Digitip
Ozendi essan nus circumdads, gea schizunt inundads da chaussas digitalas. Igl è grev da tegnair la survista. Perquai preschenta la rubrica «Digitip» mintga glindesdi products ord il mund digital, sco applicaziuns nizzaivlas, trics cun software e declera terms ord il mund digital.
Mardi – Linguarias – cun Anna Alice Dazzi
Gist quai mund digital mida era il linguatg. Perquai declera la linguista da RTR Anna-Alice Dazzi mintga mardi en sia rubrica co il linguatg sa mida, tge ch’è u fiss correct en rumantsch e co ch’i fiss da pronunziar tscherts pleds.
Mesemna – La cifra dal di
Di per di arrivan plunas da cifras tar nus. La cifra da l'emna, p.ex. ina cifra ord ina statistica grischuna, è il punct da partenza per in'istorgia. En la rubrica «Avessas Vus savì?» vegnan las audituras ed ils auditurs a savair fatgs pauc enconuschents.
Gievgia – Suvlaki, gyros e capretta – cuschina dals immigrants en il Grischun
Las pussaivladads da giudair tratgas da terras estras en noss chantun èn pulitamain grondas. Ins po ir tar il grec, ins po mangiar tailandais, ed era la cuschina tirca e chinaisa chatt’ins tar nus. Però tge mangian immigrantas ed immigrants a chasa? Nus preschentain mintga gievgia in’autra tratga per cuschinar suenter.
Venderdi – Il cumpliment da l’emna
Cumpliments fan bain al cor! Quai pon esser cumpliments per insatgi che ha fatg il curtin per sia vischina, che fa in transport u per la tatta che fa ils megliers capuns. Audituras ed auditurs pon annunziar lur cumpliment. Gievgia decida la moderaziun tgenin che vegn resguardà. Cun la persuna che fa il cumpliment vegn registrà in curt discurs, e venderdi vegn telefonà a la persuna che ha survegnì il cumpliment.