Siglir tar il cuntegn
Inhalt

Spezialitads da la Columbia cun Maribel Lopez Valencia

En la rubrica «Suvlaki, Gyros e Capretta» dal mais avrigl preschenta Maribel Lopez Valencia a nus mintgamai la gievgia a las 10:15 spaisas da sia patria, la Columbia. Spaisas simplas e plain colurs, ma er deliziusas.

Maribel Lopez Valencia.
Legenda: Maribel Lopez Valencia è oriunda da la Columbia e viva a Rueras. RTR, Gaby Degonda

Mariebel Lopez Valencia è naschida a Morales, in vitg agricul dal departament Cauca en il sidvest da la Columbia. Maribel aveva dudesch onns, cura ch'ella è ida a viver tar ina sora pli veglia en la metropola Columbiana Santiago de Cali. Là ha ella finì las scolas e lavurà durant passa 10 onns en ina butia da victualias.

L’onn 2000 è la giuvna dunna Columbiana emigrada en Spagna a Cartagena, nua ch'ella ha lavurà en la gastronomia. L'onn 2005 ha ella emprendì d’enconuscher Vendelin Cavegn da Rueras (46). El è mecanist da montascha da turbinas tar l'interpresa internaziunala «International General Electric».

La lavur da Vendelin Cavegn ha manà il pèr en pliras parts dal mund. Ensemen han els vivì en Argentina, en Ollanda, en Germania ed era en Engalterra. Lur uffants Santiago ed Angelina en naschids a Welsh Pembroke ed a Manchester. Per ch'ils uffants possian crescher si en in bun ambient han Vendelin e Maribel decidì da sa chasar a Rueras en val Tujetsch. Dapi dus onns vivan els en la chasa paterna da Vendelin.

L’avrigl ans tradescha Maribel Lopez Valencia insaquants recepts da sia patria, la Columbia.

Morales en Cauca in vitg tranter Popayàn e Cali.
Legenda: Morales en Cauca in vitg tranter Popayàn e Cali. Google Maps