Alpsu: Serrà il pass pervi da lavurs da cuvrida

La via sur il pass da lAlpsu sto vegnir serrada durant 3 dis. Quai na plascha betg a tuts, i na va dentant betg auter.

Alpsu
Legenda da maletgs: Durant il di resta la via mintgamai serrada per tut il traffic. RTR, G. Hosang

Per pudair far la cuvrida fina da catram sin var 2 kilometers tranter Tschamutt ed il pass da lAlpsu sto la via vegnir serrada mintgamai da las 7.00 fin las 19.00 uras. Per il directur da Sedrun Mustér Turissem (SMT) Hans-Kaspar Schwarzenbach è quai in problem per il turissem en la regiun. Ils giasts dal di na possian betg vegnir sperasvi.

Nagina alternativa

Tenor Pius Cavegn da lUffizi da construcziun bassa dal Grischun saja vegnì intercurì tut las pussaivladads per na betg stuair serrar il pass. Ins haja dentant constatà che quai saja la suletta varianta. En las serpentinas dovrian vehichels gronds omadus vials uschia chi na saja betg pussaivel da far in vial e suenter il segund, declera Pius Cavegn. I na saja era betg pussaivel da catramar la notg. La via existenta stoppia avair enturn 15 grads per chins possia far la cuvrida fina suravi e quai na saja betg il cas durant la notg.

Infurmaziuns actualas davart las vias dal Grischun

Pervi da la temperatura èsi tenor Pius Cavegn era be pussaivel da far questa lavur tranter mez zercladur e mez avust. Pervia dal turissem na vegnia quai dentant betg en dumonda da serrar la via aifer il fanadur e lavust. Uschia resta be in curt temp per far la cuvrida fina. Questemna nèsi pervi da laura betg pussaivel da far la cuvrida. Sper ina tscherta temperatura sto i numnadamain era restar sitg durant che la lavur vegn fatga. Il proxim termin è ils 21 fin il 23 da zercladur. Schi va dentant tut bain, dovri tenor Puis Cavegn be dus dals trais dis. In di è reserva.

Autur/a: RTR, um