Clera decisiun en favur dal campadi da Tusaun

Uschia po il manaschi dal campadi Viamala cuntinuar senza interrupziun. La pli gronda part dals preschents a la radunanza communala da mesemna saira, han valità aut l'impurtanza dal campadi per l'economia e per il turissem.

Il campadi da Tusaun.
Legenda da maletgs: Il campadi da Tusaun. RTR, Federico Belotti

Cun 71 vuschs gea e sulet ina cuntravusch ha il suveran da Tusaun decidì, da cumprar il campadi Viamala ch'è ì concurs la primavaira. Per 680'000 francs cumpra la vischnanca da Tusaun l'immobiglia dal campadi cun ustaria ed ils indrizs sanitars. Quai è la mesadad da la valita stimada.

Il cusseglier communal da Tusaun Werner Casutt è fitg cuntent cun la decisiun dal suveran. E per Rudolf Burckhardt, l'anteriur president dal cussegl d'administraziun da la «Camping Viamala SA» ch'è ida concurs, vegn l'engaschi da l'anteriura gestiunaria uschia manà enavant.

La finamira da la vischnanca da Tusaun è uss, da chattar uschè spert sco pussaivel in nov gestiunari privat per il campadi. Fin lura procura la vischnanca sezza vinavant per il manaschi.

Autur/a: Federico Belotti