Co discurran uffants il dialect tuatschin?

Ils scienziads da l'Universitad da Turitg perscruteschan linguatgs piitschens e periclitads sin l'entir mund. Ussa intercureschan els il dialect che vegn discurrì en Val Tujetsch.

Il team da l'universitad da Turitg: Sabine Stoll, Jekaterina Mazara, Géraldine Walther, Michele Loporcaro (da sen).
Legenda da maletgs: Il team da l'universitad da Turitg: Sabine Stoll, Jekaterina Mazara, Géraldine Walther, Michele Loporcaro (da sen). RTR, Hubert Giger

500 uras

6 famiglias stattan a disposiziun durant in onn per registrar, cura ch'ils uffants discurran en chasa ubain ordavert. Ils scienziads vulan registrar radund 500 uras – mintga mais 5 uras per uffant. Els vulan observar, tge svilup ch'in uffant fa cun il linguatg. Tar ils creschids èsi 100 uras.

Sco Sabine Stoll, professura da psicolinguistica a l'Universitad da Turitg ha ditg a RTR, na saja quai stà simpel da chattar famiglias, nua che uffants discurran anc tuatschin a chasa. Perquai vegnian els gist anc il dretg mument per documentar il svilup dal dialect tuatschin.

Co uffants emprendan il dialect

Documentar ed analisar il linguatg è ina finamira. In'autra è dad eruir, co ils uffants emprendan quest linguatg, e co els vegnan a frida cun plurilinguitad. Pia: Tge che schabegia, sch'els discurran a chasa dialect tudestg?

A la dumonda, pertge ch'els perscruteschan ussa il dialect tuatschin, di Sabine Stoll che quai saja impurtant dad era perscrutar ils linguatgs pitschens en l'atgna terra – pia avant l'atgna porta. A la fin dal project veglian els era dar insatge als indigens. L'idea è da far ina grammatica, in vocabulari ubain material per las scolas en dialect tuatschin.

Autur/a: RTR/hg

Autur/a: RTR/hg/ca/uca