Consum surpiglia il buffet da Casti

La societad cooperativa Consum Alvra-Surses surpiglia il buffet da la staziun da Casti. Ils ustiers Johann e Susi Berri van en pensiun la fin dal mais, suenter avair manà tschintg onns l'ustaria.

Il buffet da la staziun da Casti.
Legenda da maletgs: Il buffet da la staziun da Casti. RTR, Federico Belotti

Roman Brenn, il president dal Consum Alvra-Surses ha ditg, ch'ins possia cun il buffet da la staziun da Casti nizzegiar sinergias cun il tancadi cun butia visavi. Là saja ins vegnì a la limita da las capacitads, surtut quai che pertutga il pitschen bistro dal tancadi.

Tenor Roman Brenn duai era il kiosc dal buffet puspè vegnir reactivà. Là vul ins dasper artitgels da kiosc profitar cun vender souvenirs regiunals als blers turists che passan a Casti. Durant il mais matg renovescha la Viafier retica, ch'è la locatura dal bajetg, ed a partir da l'emprim da zercladur duai il buffet puspè esser avert.

Autur/a: Federico Belotti