Cudesch da poesias en talian – «In omagi a tant'Irma»

Ina selecziun da 20 poesias che Irma Klainguti da Zuoz ha scrit durant sia vita, datti uss er en lingua taliana. Cun quell'ovra vul la curatura Elena Wullschleger avrir il mund da la poetessa engiadinaisa er a tuts da lingua taliana.

Il nov cudesch dad Irma Klainguti.
Legenda da maletgs: Il nov cudesch dad Irma Klainguti. RTR, Anna Caprez

Ses emprim inscunter cun Irma Klainguti ha la curatura dal cudesch «Poesias – poesie» gì ils onns 1970 durant ina visita en la baselgia San Luzi a Zuoz. Là era l'artista vid il exercitar a sunar l'orgla da baselgia. L'impressiun dad Elena Wullschleger è stada d'avair sper sai ina dunna speziala cun ina solitariadad illuminada.

3 collecziuns da poesias
Irma Klainguti, che ha pir cumenzà cun passa 60 onns da scriver poesias, ha edì en tut trais ovras. «Föglias» dal 1976, «Üna boffa» dal 1980 e «Il clam dal vent d'utuon» dal 1995. En tuts trais cudeschs chatta ins il fil cotschen a maun da temas en la natira, las stagiuns u er utschels.

Ch'ina pitschna part da las passa 80 poesias dad Irma Klainguti existan uss er en lingua taliana, avra las portas ad in nov public e signifitga er in omagi ad Irma Klainguti che è morta da l'onn 2000.

Sunà orgla tutta notg
Blers Zuozinghers sa regordan anc bain da l'organista, da la dunna cun chavlira alva, numnada dals blers simplamain «tant'Irma». Quai er pervi che Irma Klainguti-Zender era mussadra da scolina durant plirs onns a Zuoz. Ina colliaziun tut speziala cun l'artista e poetessa ha er gì Rico Valär, oz professer a l'Universitad da Turitg. El haja perquai er sunà la saira avant il funeral da la poetessa uras ed uras sin l'orgla en baselgia San Luzi.

La tanta pli speziala
Irma Klainguti che è daventada baud vaiva, è adina puspè vegnida titulada sco in pau solitaria e selvadia. Ses nev, Giorgio Berner, che viva en l'Italia, sa regorda anc bain da la tanta «in pau autra». Adina n'haja la famiglia betg prendì serius quai che «tant'Irma» fascheva, admetta'l. Ed er per Marcella Zender è sia tanta stada ina persuna che amava adina puspè la suldina.

Autur/a: Anna Caprez