In tac grisch sin il maletg da la camera panoramica a Cuira
Sin il maletg da la camera panoramica che sa chatta sin il tetg dal spital chantunal da dunnas Fontana a Cuira è da vesair in tac grisch. Il tac cuvra la surbajegiada d'abitaziuns gist sut il bajetg dal spital.
Tenor Martin Vincenz, il manader da communicaziun dal spital chantunal dal Grischun, è la surbajegiada vegnida cuverta sin giavisch dad abitants. Quai ha er Norbert Candinas da la firma Nocasa, che ha realisà la surbajegiada, confermà sin dumonda da RTR.
Problematica da la protecziun da datas
Il spital chantunal che ha installà la camera ensemen cun Cuira Turissem enconuschia la problematica en connex cun la protecziun da persunas e da datas e respectia perquai sche la camera saja per intgins in zic damanaivel da las abitaziuns, uschia Martin Vincenz. Plinavant n'hajan ins betg quintà ch'i vegnia bajegia gist uschè da strusch in nov bajetg cura che la camera saja vegnida montada.
