Cumpadials: Firma da fanestras Degonda profitescha da renovaziuns

In lavurer da la firma Degonda montescha fanestras novas.
Legenda da maletgs: In lavurer da la firma Degonda montescha fanestras novas. RTR, H. Giger

Avant passa trais onns, il mars 2012, ha il pievel svizzer ditg gea a l'iniziativa encunter abitaziuns secundaras. Quai ha gì consequenzas per intginas firmas, surtut en il sectur da construcziun auta. En Surselva èsi vegnì construì pli paucas chasas d'ina famiglia.

Ma la firma Degonda SA a Cumpadials ha gì buns temps fin uss. Suenter la votaziun d'abitaziuns secundaras haja quai dà in boom da bajegiar. Bleras fatschentas hajan vulì finir projects ch'eran sin rucca. Era cun la lavur da 2015 saja el cuntent, di Clau Degonda, il schef da la Degonda SA.


Mender en l'avegnir
Ma en l'avegnir èsi da quintar che quai giaja mender. Il volum vegnia pli pitschen ed il squitsch sin ils pretschs vegnia a crescher per las interpresas, surtut tar ils bajetgs novs, manegia el.
La firma Degonda datti dapi 1964. Ella è spezialisada en renovar e sanar bajetgs, vul dir ella bajegia fanestras novas ed era curtins d'enviern (dapi 1991). Mo quels èn il mument tschertgads damain, perquai ch'ins construescha chasas cun grondas fanestras, sco Clau Degonda ha ditg ad RTR.

Autur/a: RTR/hg/dh