Cunter: Nov lieu d’inscunter per giuvenils

En il tschaler da la protecziun civila a Cunter survegnan ils scolars e giuvenils dal Surses in nov salv per sa divertir e realisar projects. La vischnanca da Surses metta a disposiziun 53'000 francs ad onn per almain ils proxims trais onns.

La plazza da ballape sur las localitads da la protecziun civila
Legenda da maletgs: La plazza da ballape sur las localitads da la protecziun civila RTR, Federico Belotti

Manà vegn il post da giuvenils da Thomas Eigensatz da Salouf ch'ha gia experientscha cun lavurar cun giuvenils entras il sport. La plazza è dotada cun 40%, e vegn organisada dal post da giuvenils Nido del Lupo d'Alvagni. Sco quai ch'il manader Fabio Botta ha ditg envers RTR saja era ina collavuraziun cun Casti pussaivla, tge che fetschia franc pli interessanta la lavur da la manadra ed il manader da la lavur da giuvenils. Il nov salv per giuvenils a Cunter pudess vegnir realisà fin il favrer da l'auter onn. Avant na saja betg pussaivel perquai che las localitads vegnan anc duvradas da l'armada svizra durant il Forum mundial d'economia WEF.


In lieu ideal - betg lunsch davent da Savognin
Per Giancarlo Torriani, il suprastant da la vischnanca Surses, saja il lieu a Cunter ideal, sura sa chattia ina plazza da ballape e cun quai che las localitads da la protecziun civila sajan gia pli baud ina giada vegnidas duvradas da giuvenils, saja avant maun ina tscherta infrastructura. Cunquai che las localitads èn en possess da la vischnanca da Surses na stoppian ins era pajar nagins tschains. A Savognin hajan ins era guardà, ma chattà nagut che haja persvadì, uschia Torriani.

Autur/a: Federico Belotti