Curaglia: La stizun vegn vendida

Anna Acton, la possessura da la stizun Prima, ha publitgà dacurt in inserat. Ella vul vender la stizun a Curaglia, respectiv sia societad BergWind GmbH per 20'000 francs. Quella aveva ella fundà per pudair manar la stizun.

Stizun a Curaglia.
Legenda da maletgs: Stizun a Curaglia. RTR, Hubert Giger

Ella vendia la stizun, perquai ch'ella stoppia transportar ils dus uffants da 5 e 6 onns dad in lieu a l'auter. Pervia da quai stoppia ella interrumper tschintg giadas a di la lavur. La consequenza saja ch'ella na possia betg sa concentrar sin sia lavur, e sco scheffa stoppian ins era esser preschenta ed avair temp per il persunal.

Betg fatg in deficit
Ella ha avert la stizun a Curaglia il matg 2017. La svieuta saja sa sviluppada meglier che previs ed ella n'haja betg fatg in deficit. In avantatg saja era stà che la vischnanca da Medel haja emprestà 65000 francs e decidì da laschar a tschains las localitads gratuitamain ils emprims tschintg onns.

Autur/a: Hubert Giger