«Currer cun cor» tras Cuira

Quai il motto dal mez maraton a Cuira, organisà vegn el da Ruedi Frehner e ses team e la cursa ha lieu ils 27 da matg da quest onn. La finamira è da rimnar daners per persunas «dischavantagiadas».

Urs Marti, president da la citad cun Ruedi Frehner l'iniziant e la Leonie Liesch da Cuira turissem.
Legenda da maletgs: Urs Marti, president da la citad cun Ruedi Frehner l'iniziant e la Leonie Liesch da Cuira turissem. RTR, Nora Baltermia

Da la Quaderwiese, tar la staziun, tras la citad veglia e sur la Via da Loe e la Via da Masans enavos sin la Quaderwiese. Sin quest traject organiseschan Ruedi Frehner e ses team ils 27 da matg 2018 ina cursa caritativa. Il traject ha ina lunghezza da 5,275 kilometers e cun currer quatter rundas vegnan ins sin la distanza d'in mez maraton. Ma la pussaivladad da far sulet ina runda è era dada uschia che tuts pon sa participar a questa cursa, la distanza la pli curta pussaivla è 300 meters. Era datti categorias sulet per uffants e per persunas cun in impediment spiertal. Sco Ruedi Frehner ha ditg duai leveniment esser per tuts.


60 fin 70 policists ston procurar per segirtad


Ma per pudair far ina tala cursa dovra quai era in grond dispositiv da segirtad. Uschia ston pliras vias vegnir serradas e durant la cursa vegnan radund 60 fin 70 policists ad esser en acziun per pudair realisar ella tras il cor da la citad da Cuira. La citad vegn a metter a disposiziun ils policists necessaris perquai che la chapitala grischuna possia profitar da l'eveniment. Uschia dettia quai pernottaziuns per la hotellaria e entradas per ils restaurants ed ils auters affars da la citad, ed era a lunga vista possia la citad profitar cun la reclama, uschia Urs Marti.


Optimissem tar ils responsabels


Ils responsabels èn fitg optimistics che l'eveniment daventia in success. Uschia han els gia fixà in termin per l'onn 2019. La finamira saja ch'il mez maraton, organisà da «Ruedirennt», daventia in termin fix en l'agenda. Enfin uss hajan ins gia radund 170 annunzias, ma per pudair cuvrir ils custs dovrian ins 555 curridras e curriders. Ils daners che vegnan generads quest di duajan ir dal tuttafatg a l'Argo.

Autur/a: Nora Baltermia