Ils maletgs d'Alois Carigiet sa chattan en ina chasa en il center da la citad veglia da Glion. En ina stanza al plaun terren, oz ina part da la boutique da moda «Boutique Q:?», ha el decorà las paraids cun differents maletgs e motivs. Creà quels maletgs ha Alois Carigiet l'onn 1939, sco ina signatura sut in dals maletgs tradescha. Tenor il possessur da la chasa Hans Lutta, vegnivan questas localitads duvradas da lez temps dal militar.
Difficil da mantegnair
Ils maletgs èn malegiads direct sin il mir da crap plitost umid, quai ch'è problematic per conservar la colur. Prender davent insaco ils maletgs da la paraid e dischlocar els en in lieu pli adattà na saja betg pussibel.
La segunda e davosa restauraziun è gist ida a fin. L'emprima restauraziun dals maletgs è succedida avant circa 30 onns. Cun sientar ils mirs spera Hans Lutta uss ch'ils maletgs tegnian pli ditg. Ils maletgs d'Alois Carigiet en la chasa Lutta san vegnir admirads durant il temp che la boutique da moda è averta.
