«Ils Piogns» – la periodica da la Val Medel

Dapi quasi 20 onns vegn la gasetta «Ils Piogns» edida. Ils trais redacturs fan quai cun engaschi e senza ina paja. Ils temas na mancan betg, sulet la successiun dals redacturs nè anc betg garantida.

Ils Piogns
Legenda da maletgs: Ils Piogns. RTR/Gionduri Maissen

Lanteriur scolast e cronist da la Val Medel Linus Beeli è dapi lentschatta in dals gronds promoturs dals «Piogns». Naschida è la gasetta suenter lediziun dal cudesch da la Val Medel. Lezza ediziun aveva laschà 12'000 francs, e tschintg dals redacturs dal cudesch, sur Marin Bearth, Clemens Pally, Maurus Venzin, Linus Flepp e Linus Beeli eran sa decidids dedir in numer demprova. Cunquai che passa 200 persunas han respundì a moda positiva e pajà la contribuziun annuala, han ils responsabels decis dedir la gasetta quatter giadas l'onn.

Temas religius, istorics e purtrets
La gasetta cuntegn savens in tema religius, meditativ, sur da baselgias chapluttas u era auters temas da tempra religiusa. Quels èn vegnids scrits lemprim blers onns da sur Martin Bearth ed ils ultims onns da sur Giusep Venzin. La spezialitad da Linus Flepp èn las caricaturas ed ils purtrets. Linus Beeli va il pli gugent en ils archivs a fufragnond per chattar listorgia da la val. Uschia cumpletteschan ils trais redacturs actuals in lauter. Ma suenter 20 onns vulan els surdar las lavurs en mauns pli giuvens. Fin uss nhajan els dentant chattà nagin per surpigliar las lavurs. Uschia na saja era anc betg decis co ì giaja vinavant cun ils «Piogns».

Ils «Piogns» vegnan da sa finanziar cun ils abunaments e cun contribuziuns e donaziuns, di Linus Beeli. La vischnanca da Medel sustegnia els gia a partir da lentschatta cun annual 5000 francs. Ma blers onns hajan els gì da sbatter cun las finanzas ed uschia era limitar la paginas e stampar la gasetta en alv e nair. Il mument saja la situaziun finanziala entant megliurada, di Linus Beeli. Il dumber d'abunaments è tranter 450 e 500 e la gronda part da las gasettas, circa duas terzas, vegn legida ordaifer la Val Medel. Quai fetschia grond plaschair e motiveschia, di Linus Beeli.

Autur/a: Gionduri Maissen