In giuven tirolais ha cumprà in manaschi puril a Curaglia

Christian Unterholzner ha 28 onns e deriva da Völlan, in vitg damanaivel da Meran. El fa da nov il pur enta Medel.

Christian Unterholzner, oriund dal Tirol dal sid
Legenda da maletgs: Christian Unterholzner, oriund dal Tirol dal sid RTR, Hubert Giger

Las contractivas per cumprar in bain puril en Svizra sajan stadas cumplitgadas. El haja stuì discutar cun plirs uffizis. Pir suenter circa in onn haja el pudì surpigliar il manaschi puril da Marius Flepp a Curaglia.
Il giuven dal Tirol dal sid è sa decidì da cumprar quel, perquai ch'i saja difficil da cumprar in bain puril en sia patria. Mo paucs veglian vender ed ils pretschs sajan bler pli auts.
Christian Unterholzner è cuntent cun las emprimas experientschas. Era la racolta da fain saja stada buna.


Tegnair nursas da latg
Sia finamira è da tegnair 130 fin 150 nursas da latg. Per quest intent bajegia el in indriz da latg - in carussel da latg numna el quai. Ultra da quai vul el construir ina chasa sin ses manaschi puril. In bun gudogn accessori saja la tratga da chauns. El ha era intginas chauras e dus chavals.


Hobi e passiun
Per el è la Val Medel in paradis e far il pur saja ses hobi e sia passiun. En il Tirol dal sid, là nua ch'el è creschi si, sajan las plauncas per part anc pli taissas.

Autur/a: RTR, hg, sc