Istorgias – Grond per pitschen

L'Uniun Rumantscha Grischun Central ha edì trais carnets cun istorgias per uffants che cumenzan a leger. Las istorgias «Grond per pitschen» cuntegnan istorgias scrittas da scolars da la segunda superiura da la scola Surses. Ellas èn vegnidas inventadas dals scolars gronds per ils scolars pitschens.

La URGC ha edì ils trais cudeschets.
Legenda da maletgs: La URGC ha edì ils trais cudeschets. MAD, URGC

Ils trais volums cuntegnan en tut 17 istorgias. Quellas istorgias raquintan dad unicorns, draguns ed er da striuns, scriva la URGC en ina communicaziun. Igl èn era da chattar istorgias da giats, mieurs u giaglinas. La gronda part da las istorgias è vegnida localisada en il Surses. Per far attractiv il leger cuntegnan quels trais volums era istorgias nua che maletgs remplazzan ils pleds. Per part èn las istorgias vegnidas illustradas dals scolars sez. La lavur da layout è vegnida fatga dal biro indigen da grafica e dissegn, Tipic a Savognin.

Pli tard era per la Val Schons

Ils trais volums «Istorgias – Grond per pitschen» vegnan mess a disposiziun gratuitamain a la biblioteca da Savognin sco er a las scolas primaras da l'intschess chalfabetisescha lur uffants en rumantsch grischun. Proximamain edescha lURGC quellas istorgias era en sutsilvan, per la scola primara a Donat.

Bain chapibel

Quels trais volums duessan enritgir la schelta da lectura per uffants chentschaivan a leger. Istorgias curtas, cumpactas e simplas. Istorgias che raquintan d'in mund da fantasia ch'attira ils uffants u era istorgias or dal mintgadi. En tut cas èn quai istorgias bain chapiblas ed illustradas cun blera colur, da quai è la URGC persvadida.

Mes amis cun midadas

Cun l'entschatta dal onn da scola nov ha l'Uniun Rumantscha Grischun Central fatg ina reediziun dal cudesch «Mes amis». Quels cudeschs vegnan regalads a las scolaras ed als scolars da las emprimas scolettas da l'intschess Surmiran sco er a l'emprima classa da la scola bilingua a Domat.

Autur/a: Federico Belotti